پولیس نے بتایا کہ حادثہ کے وقت سبھی مزدور کان میں پتھر توڑنے کا کام کر رہے تھے۔ اچانک ایک بڑی چٹان ان کے اوپر آ گری اور وہ اس کے نیچے دب گئے۔ 9 مزدوروں کی جائے وقوع پر ہی موت ہو گئی۔
کرناٹک کی راجدھانی بنگلورو کے جنوبی تعلقہ واقع مداپٹنا علاقہ میں جمعرات کی صبح ایک بڑا حادثہ پیش آیا۔ یہاں ایک پتھر کی کان میں کام کرنے والے مزدوروں پر اچانک ایک بڑی چٹان آ گری۔ اس حادثہ میں 9 مزدوروں کی موت ہو گئی ہے۔ پولیس کے مطابق ہلاک ہونے والے مزدور بہار اور آسام کے رہنے والے تھے اور یہاں یومیہ اجرت پر کام کرتے تھے۔
پولیس نے بتایا کہ حادثہ کے وقت تمام مزدور کان میں پتھر توڑنے کا کام کر رہے تھے۔ اسی دوران ایک بڑی چٹان ان پر آ گری اور وہ اس کے نیچے دب گئے، جس کے باعث موقع پر ہی ان کی موت ہو گئی۔ ایک مزدور نے بتایا کہ حادثہ کے وقت وہاں تقریباً 18 مزدور کام کر رہے تھے۔ یہ چٹان تقریباً 40 فٹ کی بلندی سے نیچے گری تھی۔ اتنی زیادہ بلندی سے گرنے کی وجہ سے مزدوروں کو بچنے کا کوئی موقع نہیں ملا۔
حادثہ میں زخمی ہونے والے مزدوروں کو فوری طور پر قریبی پرائیویٹ اسپتال میں داخل کرایا گیا ہے۔ اب تک زخمیوں کی صحیح تعداد کی تصدیق نہیں ہو سکی ہے۔ اس حادثہ کی اطلاع ملتے ہی پولیس اور امدادی ٹیمیں فوراً موقع پر پہنچ گئیں اور راحت و بچاؤ کا کام شروع کر دیا۔ پورے علاقے کو گھیرے میں لے لیا گیا ہے تاکہ ملبہ ہٹانے کا کام آسانی سے کیا جا سکے۔ حکام اس بات کی بھی جانچ کر رہے ہیں کہ کہیں مزید کوئی مزدور ملبہ کے نیچے تو نہیں دبا رہ گیا ہے۔
پولیس نے بتایا کہ تمام ہلاک شدگان کی شناخت کی جا رہی ہے اور ان کے اہل خانہ کو اس افسوسناک واقعہ کی اطلاع دینے کی کوشش کی جا رہی ہے۔ اس کے ساتھ ہی پولیس نے اس بات کی بھی جانچ شروع کر دی ہے کہ آخر یہ چٹان کیوں گری۔ یہ بھی دیکھا جا رہا ہے کہ کان میں حفاظتی اصولوں پر عمل کیا جا رہا تھا یا نہیں۔ اگر تحقیقات میں کسی قسم کی لاپروائی سامنے آتی ہے تو ذمہ دار افراد کے خلاف کارروائی کی جا سکتی ہے۔ فی الحال پورے علاقے میں غم کا ماحول ہے اور مزدوروں کے اہل خانہ اس خبر سے صدمے میں ہیں۔
اس درمیان کرناٹک کے وزیر اعلیٰ ڈی کے شیوکمار نے بنگلورو جنوبی تعلقہ کے مداپٹنا علاقے میں پیش آئے اس دردناک حادثے پر گہرے رنج و غم کا اظہار کیا ہے۔ وزیر اعلیٰ نے کہا کہ یہ واقعہ انتہائی افسوسناک ہے۔ انہوں نے ہلاک شدگان کی روح کے ایصال ثواب کے لیے دعا کی اور ان کے اہل خانہ سے تعزیت کا اظہار بھی کیا۔ وزیر اعلیٰ نے زخمیوں کی جلد صحت یابی کے لیے بھی دعا کی۔
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
