میں کلب اور احاطے پر قبضہ رکھنے والے تمام متعلقہ افراد کو 7 جولائی تک اپنا جواب جمع کرانے اور اسی روز دوپہر 2.30 بجے ذاتی سماعت کے لیے پیش ہونے کی ہدایت دی گئی ہے۔
i
تاریخی ’دہلی جمخانہ کلب‘ کو لینڈ اینڈ ڈیولپمنٹ آفس (ایل اینڈ ڈی او) نے احاطہ خالی کرنے کے لیے وجہ بتاؤ نوٹس جاری کیا ہے۔ اس نوٹس میں محکمہ نے کلب انتظامیہ کو ہدایت دی ہے کہ وہ 7 جولائی کو دوپہر ڈھائی بجے سماعت کے لیے اپنے جواب کے ساتھ حاضر ہو۔ نیا قانونی نوٹس ملنے کے بعد کلب انتظامیہ دہلی ہائی کورٹ میں آئندہ سماعت کے پیش نظر اپنی قانونی لڑائی کو مزید مضبوط بنانے میں مصروف ہو گئی ہے۔
لینڈ اینڈ ڈیولپمنٹ آفس (ایل اینڈ ڈی او) کے اسٹیٹ آفیسر بپن کمار سنگھ نے 29 جون کو جاری کیے گئے وجہ بتاؤ نوٹس میں دہلی جمخانہ کلب سے پوچھا ہے کہ ’پبلک پریمسز (غیر مجاز قابضین کی بے دخلی) ایکٹ، 1971‘ کے تحت ان کے خلاف بے دخلی کا حکم کیوں نہ جاری کیا جائے۔ نوٹس میں کلب اور احاطے پر قبضہ رکھنے والے تمام متعلقہ افراد کو 7 جولائی تک اپنا جواب جمع کرانے اور اسی روز دوپہر 2.30 بجے ذاتی سماعت کے لیے پیش ہونے کی ہدایت دی گئی ہے۔
بدھ کی دوپہر نیا سرکاری نوٹس موصول ہونے کے بعد دہلی جمخانہ کلب کی قانونی ٹیم جواب تیار کرنے میں پوری طرح مصروف ہو گئی ہے۔ اراکین کا کہنا ہے کہ یہ پورا معاملہ پہلے ہی دہلی ہائی کورٹ میں زیر سماعت ہے، جہاں اس معاملے پر آئندہ اہم سماعت 28 جولائی کو مقرر ہے۔ اراکین کو پورا یقین ہے کہ اس پیچیدہ تنازعہ کا حتمی حل صرف عدالتی عمل کے ذریعے ہی ممکن ہوگا۔
کلب کے ایک سینئر رکن میجر اتل دیو نے بتایا کہ برسوں سے اس ادارے سے وابستہ لوگوں کے لیے یہ نوٹس ایک بڑا دھچکا اور مایوسی کا باعث ہے۔ انہوں نے کہا کہ یہ کلب صرف تفریح کی جگہ نہیں بلکہ ایسا مقام ہے جہاں لوگ اپنے خاندانوں کے ساتھ وقت گزارتے ہیں اور گہرے تعلقات استوار کرتے ہیں۔ ایک دیگر رکن وجے کھرانہ نے بھی کہا کہ کھیلوں اور سماجی سرگرمیوں کے ذریعہ ان کی کئی نسلیں اس کلب سے جذباتی طور پر وابستہ رہی ہیں۔
دوسری جانب نئے قانونی نوٹس کی اطلاع ملتے ہی جمخانہ کلب ورکرز ایسوسی ایشن کے صدر نندن سنگھ نیگی اپنے آبائی شہر سے دہلی کے لیے روانہ ہو گئے۔ انہوں نے بتایا کہ اس غیر یقینی صورت حال کے باعث کلب کے 600 سے زائد ملازمین اپنے مستقبل کو لے کر شدید فکرمند ہیں اور مسلسل فون کر رہے ہیں۔ نیگی نے کہا کہ وہ دہلی پہنچ کر کمیٹی کے ساتھ اجلاس کریں گے اور قانونی عمل پر اعتماد رکھتے ہوئے آئندہ کا لائحۂ عمل طے کریں گے۔
قابل ذکر ہے کہ لوٹینز دہلی کے وسط میں واقع ’2، صفدر جنگ روڈ‘ پر موجود یہ وسیع و عریض احاطہ اصل میں امپیریل دہلی جمخانہ کلب لمیٹڈ (موجودہ دہلی جمخانہ کلب لمیٹڈ) کو ایک سماجی اور کھیلوں کے کلب کے طور پر چلانے کے لیے لیز پر دیا گیا تھا۔ یہ نہایت اہم اور قیمتی اراضی کا ٹکڑا لوک کلیان مارگ پر واقع وزیر اعظم کی رہائش گاہ کے بالکل قریب ہے۔ یہ پورا علاقہ انتہائی سخت سیکورٹی والے انتظامی زون میں آتا ہے، جہاں مرکزی حکومت اور دفاع سے متعلق کئی اہم ادارے بھی موجود ہیں۔
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
