میونسپل انتظامیہ کے مطابق اسلم شیخ بارش کے دوران کھلے مین ہول میں گر گئے تھے، جس کے بعد تلاش کے دوران ان کی لاش برآمد ہوئی۔ واقعے نے شہریوں میں تشویش پیدا کر دی ہے کیونکہ مسلسل بارش کے باعث ممبئی کے کئی علاقوں میں سڑکیں زیر آب ہیں اور نکاسیٔ آب کا نظام دباؤ کا شکار ہے۔
ممبئی کی میئر ریتو تاوڑے نے واقعے پر گہرے رنج کا اظہار کرتے ہوئے کہا کہ شدید بارش کے پیش نظر ریڈ الرٹ نافذ تھا اور اسی دوران مین ہولوں پر جالیاں نصب کرنے کا کام جاری تھا، لیکن متعلقہ مقام پر نہ حفاظتی رکاوٹیں لگائی گئیں اور نہ ہی عوام کو خبردار کرنے کے مناسب انتظامات کیے گئے۔ انہوں نے کہا کہ اس معاملے میں لاپروائی برداشت نہیں کی جائے گی، چار افسران کو معطل کر دیا گیا ہے اور متاثرہ خاندان کو دس لاکھ روپے کی مالی امداد دی جائے گی۔ انہوں نے یہ بھی کہا کہ اس بات کی جانچ کی جائے گی کہ اگر منصوبہ دو سال پہلے منظور ہوا تھا تو کام بروقت کیوں مکمل نہیں کیا گیا اور بارش کے دوران ہی اسے انجام دینے کی نوبت کیوں آئی۔
